X

Eu son a Moura da Costa da Morte, a túa guía nesta experiencia pola ría de Corcubión, na que percorreremos os municipios de Fisterra, Corcubión, Cee, Dumbría e Carnota.

Nesta experiencia descubriremos fortalezas medievais, faros que alumean este finis terrae un rico patrimonio industrial, singulares construcións como os hórreos de Carnota e Lira e máxicos redutos de natureza autóctona.

Convídote a acompañarme ata Fisterra, un lugar especial por ser o final do único dos Camiños de Santiago que non remata en Compostela. Enclave de gran valor simbólico, vinculado a ritos de purificación, morte e resurrección, en Fisterra atoparemos a potente luz do seu faro, que non é a única que sinaliza a ría de Corcubión. O faro de Cabo Cee é outro dos puntos imprescindibles na ruta que che propoño.

Ao longo do noso percorrido non nos apartaremos do mar, pois del dependen numerosos atractivos da zona como son: a lonxa turística de Fisterra, o Conxunto Histórico-Artístico de Corcubión, as praias de Lagosteira e Sardiñeiro e varias fortificacións construídas para defender a ría, como son os Castelos do Cardeal e do Príncipe.

Pero se queres empaparte da natureza máis singular e da auténtica da Costa da Morte, levareite a coñecer a maxia do Monte Pindo, coñecido como o Olimpo Celta, e a impresionante Fervenza do Ézaro, a única de Europa que desemboca directamente no mar. E se desexas coñecer máis sobre estes dous lugares, sempre podemos achegarnos ata o Centro de Interpretación de rutas Monte Pindo e Fervenza do Ézaro, en Dumbría.

Convídote a vivir esta experiencia pola #CostadaMorte e a coñecer estes lugares coa información que tes dispoñible nesta ligazón.