Hoxe coñeceremos Dumbría, municipio da excepcional Fervenza do Ézaro, o Monte Pindo ou a pequena aldea de Olveiroa, pola que pasa o Camiño de Santiago.
En primeiro lugar recoméndoche visitar o santuario da Virxe das Neves de Buxantes coa súa fonte santa. Unha vez máis, un lugar de lendas na Costa da Morte…
Despois podes achegarte ata o conxunto artístico de Olveiroa, unha pintoresca aldea con hórreos, casas e rúas que aínda conservan o seu trazado orixinal, e por onde transcorre o Camiño de Santiago (tamén conta con albergue de peregrinos). Pero ten coidado cando esteas por aquí, pois segundo a lenda de Vakner existía un monstro que devoraba a quen facía o camiño…
Outra alternativa para realizar durante o día, ou incluso ver o solpor, é subir a Chan das Lagoas (Berdeogas), lugar no que se sitúa a estación de control marítimo e que conta cunhas excelentes vistas: desde Malpica ata a Serra do Barbanza, desde o Val de Soneira ata a comarca do Xallas.
Para rematar a tarde e pechar un día perfecto, recoméndoche un paseo pola praia do Ézaro e despois visitar o Centro de Interpretación de rutas Monte Pindo e Fervenza do Ézaro. En todo momento permaneceremos baixo o dominio visual do maxestuoso Olimpo Celta.
Para vivir unha auténtica experiencia nestas augas máxicas podes contactar coa empresa AdventurÉzaro, que organiza rutas en kaiak e rutas de sendeirismo ao Monte Pindo.
Para sentir a experiencia que che propoño debes dirixirte á Fervenza do Ézaro.
Dumbría é unha terra de contrastes na que historia e natureza fusiónanse coas lendas… Di a tradición que na Fervenza do Ézaro as mans da auga tallaron na rocha un pozo escuro chamado Cadoiro. No fondo do pozo agóchase un gran tesouro custodiado por tres meigas; as siluetas poden descubrirse nas rochas das paredes circundantes.
O caso é que existe unha porta máxica oculta tras as súas augas… Igualmente custodiada polas meigas. O mozo que se atreva a cruzala romperá o feitizo coa súa valentía e será conducido ao fondo do río por esas temibles gardiás. Nas profundidades atopará unha bela princesa encantada, con quen poderá casar e posuír unha enorme fortuna.
Atréveste a atopar a estas tres gardiás? Porque din que habelas, hainas...
Recoméndoche tamén visitar o Cemiterio de Dumbría, un camposanto de estilo neoplasticista que, aínda que pareza un paradoxo, está cheo de vida: aquí a cor e a luminosidade son os protagonistas.