Comezaremos o día no cabo de Santo Hadrián, lugar do Santuario levantado baixo esa mesma advocación. O santuario de Santo Hadrián é unha paraxe de peregrinación onde se celebra a Festa de Interese Turístico de Galicia de Santo Hadrián do Mar, un enclave onde se funden lendas, mitos, ritos e crenzas populares. Desde alí, divisaremos as Illas Sisargas.
Seguro que, chegados a este punto, a brisa do mar espertou o teu apetito. Que tal unha parada para comer? Aproveita algúns dos restaurantes que hai neste pobo mariñeiro!
Un bo plan para a tarde é visitar os museos: a Colección Urbano Lugris que podes coñecer contactando coa confraría; e o Ecomuseo do Forno do Forte, que ofrece visitas guiadas e demostracións de elaboración de pezas da olería de Buño.
Outra proposta para a tarde consiste en gozar da natureza na contorna dos Muíños da Ribeira, un conxunto etnográfico formado por cinco muíños.
Para sentir a experiencia que che propoño agora achegarémonos a Buño, un lugar no que conviven natureza, tradición e artesanía.
Aquí viviremos parte desa cultura popular de Malpica. Hai tradicións que non foron escritas senón que, como facían os antigos druídas, se transmitían a través da cultura oral e a arte: historias, cantos, danzas… Así foi como, xeración tras xeración, se foi conservando o segredo da olería de Buño. Agora tes ese segredo ao teu alcance no Ecomuseo do Forno do Forte, onde descubrirás como era a vida e traballo dos oleiros tradicionais. Tamén poderás ver cos teus propios ollos a realización dunha peza paso a paso.
Como xa che dicía antes, tamén estás nun lugar de superstición e de gran simbolismo. Así que se es unha persoa curiosa seguro que aproveitarás o teu paso por Santo Hadrián para achegarte ata a súa fonte milagreira.