Comeza o horario de tempada baixa nas Torres do Allo.
Este pasado domingo 16 de setembro pechou a tempada alta no pazo máis antigo de Galicia. Un precioso concerto do dúo folk Caamaño-Ameixeiras serviu como colofón final a un verán histórico nas Torres do Allo. Máis de cen persoas acudiron á convocatorio da Concellería de Cultura de Zas para dar por finalizada a tempada alta no pazo do Allo. A partir desta semana, dende este luns 17 de setembro e ata o 15 de xuño do ano que vén (salvo Semana Santa), o monumento das Torres do Allo abrirá os sábados, domingos e festivos en horario de 11:00 da mañá a 19:00 da tarde. As visitas guiadas gratuítas seguirán sendo á 13:00 e ás 17:00; non é necesario facer reserva.
Continuamos coas actividades para toda a familia co Xogo de Pistas "Os Segredos Ocultos nas Torres" que se pode realizar a calquera hora en horario de apertura e tamén sen reserva previa. Non así o Escape Room "Pazo do Allo", un innovador xogo de escapismo para grupos de persoas adultas, que finalizou tamén este domingo pasado con un éxito fóra de toda previsión. Nel participaron máis de 500 persoas de todas partes de Galicia e do resto do Estado cun grao de satisfacción moi alto que fai pensar xa na vindeira edición.
Este outono dará comezo tamén o Programa Didáctico das Torres do Allo enfocado á comunidade educativa con visitas guiadas adaptadas a cada tramo de idade e obradoiro escolares como Sementes do Allo, Escudo de Familia, a Xincana do Allo, e Tecendo a miña Roupa. Estas actividades realizaranse os venres e son totalmente gratuítas baixo reserva previa por parte dos centros escolares. Dende a web www.torresdoallo.gal pódese descargar o cartafol con todo o programa didáctico, consultar os novos horarios de apertura, e permanecer atentx ás actividades especiais que se realizan durante todo o ano no monumento do Concello de Zas.
