Asociación de Turismo da Costa da Morte

Esta iniciativa quere promover o turismo deportivo no xeodestino Costa da Morte

Participantes e acompañantes poderán beneficiarse de descontos especiais e actividades complementarias ao evento deportivo

Este programa, promovido pola CMAT ca participación da Deputación da Coruña busca converter a Costa da Morte nun referente na organización de actividades deportivas para tódolos públicos e disciplinas. Despois do éxito da IX Carreira de Vimianzo do pasado sábado 31 de marzo, é a quenda da II Challenge Junior de Carballo, organizada polo Club Ciclista Carballo.

As tres etapas desenvolveranse entre o sábado 6 e o domingo 7 en diferentes escenarios privilexiados do concello, como a praia de Razo ou o Monte Neme. Para facer máis atractiva a oferta turística, a Asociación de Turismo CMAT organizou un programa en colaboración cunha vintena de establecementos da zona que pretende ofrecer unha experiencia integral aos participantes e as persoas que os acompañen.

O plan inclúe descontos en catorce establecementos de aloxamento de todo tipo, dende hoteis a casas rurais, e ducias de actividades de turismo activo con rebaixas dun 20% sobre o seu prezo; coma bautismos de surf ou paintball. E para rematar a proposta, dúas actividades de balde para desfrutar do Carballo máis moderno e cultural: o festival de contidos dixitais Carballo Interplay e a visita guiada ao proxecto de arte urbana “Derrubando muros con pintura”.

E cal é a vindeira data de Costa da Morte Turismo + deporte ? A Carreira Vikinga de Carnota do próximo 21 de abril, que promete reunir aos afeccionados do running da comarca e de toda Galicia.

O obxectivo final do programa é afianzar a Costa da Morte coma destino de turismo activo, ao tempo que se presenta coma un xeodestino onde conflúen actividades e experiencias para tódolos públicos e intereses.

Adxunto: Dossier de actividades e descontos