A nosa experiencia levaranos a descubrir o esplendor de casas señoriais como os pazos de Trasariz, Torres do Allo, Edreiras ou o de Follente, que tivo como ilustre morador ao xeógrafo Domingo Fontán. Pero tamén será unha boa ocasión para descubrir lugares de gran valor etnográfico: o núcleo de Olveiroa, unha aldea tradicional coa peculiaridade de albergar a maior concentración de hórreos por habitante; e os batáns e muíños de Mosquetín.
Fortalezas como o Castelo de Vimianzo, ermidas de singular beleza situadas na contorna, igrexas e pontes ao carón do Camiño de Santiago e outros elementos arquitectónicos axudarannos a conectar co insigne pasado destas terras, que tamén atesouran vestixios prehistóricos como os castros das Barreiras e de Monte Aro.
E como curiosidade, xa que estamos en plena Costa da Morte recoméndoche o Cemiterio de Cores, un camposanto que se aparta da arquitectura funeraria tradicional pola luminosidade e polo colorido dos seus deseños.