Asociación de Turismo da Costa da Morte

Este 2019 foi un ano moi produtivo para a CMAT, xa que se seguiu avanzando no cumprimento do Plan de Acción para o Turismo de Costa da Morte 2019-2021 traballando de xeito intenso en algunhas das liñas estratéxicas. De cara ao ano que ven, seguiremos poñendo todos os nosos esforzos para conseguir o recoñecemento turístico que a Costa da Morte merece.

Comezamos pola nosa marca, que á metade do ano transformouse radicalmente. En agosto presentamos unha nova imaxe, máis atractiva e que busca simbolizar a riqueza do xeodestino co verde da súa natureza, o azul do mar ou o laranxa dos solpores.

Esa nova imaxe xa loce nas novas guías turísticas e trípticos que preparamos para os nosos visitantes. Os trípticos son catro, un por cada un dos nosos valores de marca cos que queremos que sexa coñecida a Costa da Morte: “Naturalmente salvaxe”, “Máxica e espiritual”, “Carácter mariñeiro” e “Tradicional e profunda”, mentres que a guía abárcaos dun xeito máis completo. Ademais do formato en papel que se pode atopar en diferentes puntos dos concellos da zona como Oficinas de Turismo e puntos de información, están dispoñíbeis para consulta e descarga na nosa web.

Outro dos puntos fortes nos que traballamos ao longo do 2019 foi a promoción do turismo deportivo. Naceu deste obxectivo o proxecto “Costa da Morte Turismo + Deporte”, que conta ca colaboración de diferentes establecementos turísticos para garantir unha experiencia do máis atractiva para os deportistas que veñen realizar algunha proba e os seus acompañantes. De cara ao vindeiro ano este proxecto seguirá tomando forza no xeodestino, con máis establecementos adheridos e probas deportivas asociadas. De feito, vimos de presentar o novo dossier de promocións esta mesma semana.

Pensando neses mesmos profesionais da hostalería e do turismo preparamos un completo programa formativo de balde. Durante os meses de outubro e novembro impartimos os seguintes cursos para o sector en Costa da Morte: “Marketing turístico online para destinos e empresas turísticas e deseño de programas culturais”, “Mellora da competitividade da hostalaría e empresas turísticas de Costa da Morte en gastronomía local”  e “Inglés básico e medio aplicado á hostalaría e turismo”. Todos eles foron un éxito de participación e os asistentes salientaron a utilidade e o aspecto práctico de cada un deles.

Este 2019 foi tamén o ano de cambio na Xunta Directiva. En xullo dixemos adeus a Juan Blanco, alcalde de Mazaricos como presidente e saudamos a Santiago Toba, alcalde de Muxía. O novo presidente e o resto de membros da xunta directiva leva dende entón traballando e implicándose en tódalas accións que levamos a cabo.

Como dixemos, este 2019 foi un ano cheo de actividades e proxectos para a CMAT. Estivemos presentes en diferentes feiras e eventos turísticos coma Fitur ou a Feira Atlántica Gastronómica, tamén nos involucramos no recoñecemento da Costa da Morte coma Reserva Mundial de Surf, démoslle un empurrón á nosa estratexia en redes sociais e ata fixemos un concurso en Instagram co apoio de Suministros Lar.

Para o 2020 temos o compromiso de seguir traballando para converter á Costa da Morte no destino turístico favorito de tódolos públicos. Feliz ano!