Torres do Allo supera os 2.000 visitantes dende comezos de ano
As Torres do Allo continúa batendo récords de público mes a mes. En maio foron máis de 700 as persoas que visitaron o monumento e realizaron algunha das súas actividades especiais. Isto supón un incremento de máis do 70% con respecto do mes de maio do ano anterior. En total son 2.126 as persoas visitantes dende comezos de ano ata este 1 de xuño. Un incremento certamente espectacular respecto do 2017 no que se rexistrou un acumulado de 1.637 persoas; e aínda máis con respecto do 2016, no que o acumulado era de 765 persoas. Polo tanto falamos dun incremento acumulado do 30% e do 177% respectivamente.
A estes datos contribúe significativamente o comezo das actividades didácticas dirixidas á comunidade escolar dentro do programa educativo das Torres do Allo. Foron máis de douscentos alumnxs de diversas idades xs que recalaron no Allo para facer a visita guiada didáctica e algún dos seus obradoiros, notablemente a Xincana do Allo, un xogo de probas a través do cal coñecen a historia do pazo e da súa contorna.
Tamén os grupos organizados escollen cada vez con máis frecuencia e antelación este destino turístico-cultural como parte do seu itinerario programado. 191 persoas achegáronse a este monumento do Concello de Zas para visitalo en grupo, entre elas as pertencentes ao intercambio Regueifesta, e a senda inclusiva Camiño Sen Límites, entre outros.
